Bulego Judiziala Euskadin
Bulego Judiziala epaitegietako lan-antolakuntzaren eredu berria da. Egitura moderno, arin eta koordinatuan oinarritzen da, epaileen eta magistratuen jurisdikzio-lana babesteko.
Eredu hau 1/2025 Lege Organikoan, Justizia Zerbitzu Publikoaren eraginkortasunari buruzko neurriei buruzkoan, eta Eusko Jaurlaritzaren 2025eko uztailaren 2ko Aginduan oinarritzen da. Ezarpena progresiboa eta mailakatua izango da lurralde osoan.
Informa zaitez honi buruz
- Ezarpena Euskadin
- Bulego Judizialaren egitura
- Koordinazioa eta zeharkako zerbitzuak
- Justizia eraginkorrago baten bidean
- Erreferentziako araudia
Ezarpena Euskadin
Lehen fasean, eredu berria Amurrio, Azpeitia, Balmaseda, Bergara, Durango, Gernika, Getxo, Irun eta Tolosa barruti judizialetan aplikatzen da, eta bertan Instantziako Auzitegiak eta dagozkien Bulego Judizialak izango dira.
Euskal Autonomia Erkidegoak eskumena du bulego horien antolaketa eta dimentsioa zehazteko, Botere Judizialaren Lege Organikoaren (LOPJ) 436tik 438ra bitarteko artikuluetan xedatutakoaren arabera.
Bigarren fasean, 2025eko abenduaren 31tik aurrera, Gasteiz, Bilbo, Donostia-San Sebastián, Barakaldo eta Eibar barruti judizialetan eratuko dira Instantziako Auzitegiak, eta epaitegiak dagokien ataletara bihurtuko dira, 1/2025 Lege Organikoaren bigarren xedapen iragankorrean aurreikusitakoarekin bat.
Bulego Judizialaren egitura
Bulego Judizial bakoitza zerbitzu erkideek osatzen dute, eta bertako langileek modu koordinatuan lan egiten dute prozedura judizialak eraginkortasunez eta gardentasunez izapidetzeko.
Izapidetze Zerbitzu Erkidea
Prozedura judizialen antolaketa, izapidetzea eta betearazpena kudeatzen ditu fase guztietan.
Bere eginkizun nagusien artean daude:
- Idazkiak eta errekurtsoak jasotzea eta izapidetzea.
- Epaileei eta magistratuei laguntza zuzena ematea.
- Seinalamenduak, epeak eta artxiboak kudeatzea.
- Betearazpenak eta neurri judizialak izapidetzea.
- Agenda judizialen koordinazioa.
Zerbitzu honek honako kidegoetako langileak ditu:
- Justizia Administrazioko Letratuak (LAJ).
- Prozesu eta Administrazio Kudeaketa.
- Prozesu eta Administrazio Izapidetzea.
Barruan hartzen ditu arlo zibila eta instrukzio-arloa, eta emakumeen aurkako indarkerian espezializatutako talde bat.
Zerbitzu Erkide Orokorra
Jarduera judizial osoari eusten dioten zeharkako eta laguntza-eginkizunak bere gain hartzen ditu, besteak beste:
- Idazkiak eta dokumentazioa erregistratzea eta banatzea.
- Jakinarazpen-egintzak eta betearazpenak.
- Laguntza judizial nazionala eta nazioartekoa.
- Herritarren, profesionalen eta biktimen arreta.
- Aretoen, artxiboen eta gordailu judizialen kudeaketa.
- Auzitegietako lehendakaritzekin, Fiskaltzaren Bulegoarekin eta Erregistro Zibilarekin koordinazioa.
Justizia Administrazioko Letratu batek zuzentzen du, eta Kudeaketa, Izapidetze eta Laguntza Judizialeko langileek babesten dute.
Koordinazioa eta zeharkako zerbitzuak
Bulego Judizialek elkarlanean jarduten dute honako hauekin:
- Fiskaltzaren bulegoak.
- Udalerrietako Justizia Bulegoak, lehengo Bake Epaitegien ordezkoak.
- Bitartekaritza-zerbitzuak eta gatazkak konpontzeko bide egokiak.
Bulego bakoitzak, gainera, guardia-zerbitzua eta egokitutako ordutegiak izango ditu arreta jarraitua bermatzeko.
Justizia eraginkorrago baten bidean
2025eko eredu berriak bultzada ematen dio honako ezaugarriak dituen justizia bati:
- Herritarrengandik hurbilagoa eta arinagoa.
- Organo eta zerbitzuen artean hobeto koordinatua.
- Digitalagoa, elkarreragingarriagoa eta zerbitzu publikora bideratua.
Erreferentziako araudia
- 1/2025 Lege Organikoa
, urtarrilaren 2koa, Justizia Zerbitzu Publikoaren eraginkortasunari buruzko neurriei buruzkoa. - 2025eko uztailaren 2ko Agindua , Eusko Jaurlaritzako Justizia eta Giza Eskubideen sailburuarena.
- 6/1985 Lege Organikoa , uztailaren 1ekoa, Botere Judizialari buruzkoa.
- 1608/2005 Errege Dekretua , abenduaren 30ekoa, Idazkari Judizialen Kidegoaren Erregelamendu Organikoa onartzen duena.