20/2011 Legearen bederatzigarren xedapen iragankorrak ezartzen duen moduan, laugarren xedapen gehigarrian xedatutakoa legea indarrean sartu aurretik gertatutako heriotza guztiei aplikatuko zaie, baldin eta gurasoek bi urteko epean hala eskatzen badute.

Bederatzigarren xedapen iragankorrak aipatzen duen bi urteko epea, uztailaren 21eko JUS/876/2023 Agindua argitaratu eta hurrengo egunean hasiko da. Hau da, haurdunaldiko sei hilabeteen ondoren gertatutako heriotzak Erregistro Zibilean sartzea eskatu ahal izango dute gurasoek, 2023ko uztailaren 28tik 2025eko uztailaren 28ra arte.

Eskaera egiteko, gurasoetako edozeinek Segurtasun Juridikoaren eta Fede Publikoaren Zuzendaritza Nagusiaren 2023ko uztailaren 31ko Jarraibideari erantsitako eredua aurkeztu beharko du bere bizilekuko Erregistro Zibilean edo dagokion 9. eredua (abortu-haurren aitorpena eta erditze-partea) artxibatuta duen Erregistro Zibilean.

Eskaera aurkeztu ondoren, erregistroko arduradunak lehen aipatutako 9. eredua bilatuko du. Aurkeztutako eredu berriarekin erkatu ondoren, azken eredu hori "Haurdunaldiko lehen sei hilabeteen ondoren bizitzarik gabe jaiotakoen artxiboan" sartuko du, 2023ko uztailaren 31ko Instrukzioko lehenengo eta bigarren jarraibideen arabera.

Amaitzeko, erregistroko arduradunak ohar bat erantsiko du abortu-haurren paper-sortaren 9. ereduan, adieraziz bizirik gabeko jaiotza hori artxibo berrira lekualdatu dela.