Eduki nagusira joan

Justizia Administrazioa Euskadin

Justizia Administrazioa Euskadin - Administración de Justicia en Euskadi
Hemen zaude: Albisteak

Albisteak

Artolazabalek gazte-justiziaren "balioak, printzipioak eta helburuak" goraipatu ditu, espetxe-politiketerako ispilu gisa

2021(e)ko irailaren 30a

Beatriz Artolazabal.

Beatriz Artolazabal Berdintasun, Justizia eta Gizarte Politiketako sailburuak parte hartu du Diario Vascok antolatu duen III. Foro Juridikoaren (Gazteen justizia, erreformatorioetatik birgizarteratzera) inaugurazio-ekitaldian. Tabakaleran egin den foroa gazte-justiziari buruzkoa izan da.

Urriaren 1ean euskal espetxeen kudeaketa bere gain hartzeko dagoenean, Artolazabalek Gazte Justiziako Euskal Sistemaren eraginkortasuna goraipatu du bere hitzaldian. Sistema horrek 25 urte bete ditu dagoeneko, eta sailburua ziur dago sistema hori estrapola daitekeela etorkizuneko euskal espetxe-ereduko helduen justiziara.

 “Gazte Justiziako sistemaren ispiluari begiratu nahi diogu, Euskadin gure espetxe-eredua gauzatzeko garaian”, adierazi du sailburuak. “Gure Gazte Justiziako sistemaren arrakasta eragin duten balio, printzipio eta helburu berberei jarraituko diegu; izatez, harrotasunez begira diezaiokegu zenbait hamarkadatako ibilbidea duen eredu horri”, erantsi du.

Orientazio errestauratiboaz hitz egin ondoren -“esku-hartzeen indibidualizaziotik eta, beti, ikuspegi komunitarioari eusten saiatuz”-, Artolazabalek aitortu du kudeaketa-eredu hori soilik dela posible erantzukizun publikotik eta lankidetza publiko-sozialetik.

Gazte Justiziako eredua

Eusko Jaurlaritzak garatzen duen Gazte Justiziako eredua duela mende laurden sortu zen, Adingabeen Epaitegiek emandako neurrien betearazpena Eusko Jaurlaritzak bere gain hartu zuenean. Hala, Justiziaren arloan eskumena zuen sailaren esku geratu zen gazte-justiziaren plangintzaren eta kudeaketaren erantzukizuna. Orduz geroztik, “gure euskal eredua urtez urte finkatu da. Jarraitutasuna izan du 25 urte hauetan, batera eta bestera ibili gabe -aldaketa politikoak izan badira ere-, eta adostasun politiko zabala bildu du”, sailburuak aditzera eman duenez.

Era berean, Beatriz Artolazabalek Gazte Justiziako euskal ereduaren alderdirik “adierazgarrienak” azaldu ditu. Alderdi horien artean nabarmentzen da erantzukizuna eta finantzaketa publikoak direla, baina kudeaketa mistoa dela; izatez, hirugarren sektore soziala deiturikoaren erakunde pribatuek esku hartzen dute. Halaber, aipatu du zenbait planen bidez egituratzen den eredua dela, eta plan horiek “plangintzarako, kudeaketarako eta ebaluaziorako oinarrizko tresna” gisa sortu direla, sailen arteko esku-hartzearekin.

 “Esku-hartzearen paradigma hezitzailea da, jarduteko printzipio argietan oinarritzen dena eta ebidentzia zientifikoetan oinarritutako programak oinarri dituena. Erantzukizun-eredu gisa defini dezakegu, bai gatazkan, bai ebazpenean”, adierazi du Artolazabalek.

Azkenik, Berdintasun, Justizia eta Gizarte Politiketako sailburuak espetxeen kudeaketaren gaiari heldu dio ondorioetan, eta aitortu du jarduteko denbora beharko dela “geure eredua” finkatzeko. Jarduteko eredu hori “euskal espetxeetan egindako lanaren aitorpenetik abiatzen da”. “Eusko Legebiltzarrean onartutako oinarriak izango dira joko-eremua, eta joko-eremu horren barruan mugitu beharko dugu. Ziur gaude hobetzeko tartea dugula eta gaitasun hori soseguz eta konpromisoz kudeatuko dugula”, eman du aditzera.

Idatzi zure iruzkina


Ez da argitaratuko
 
*